Actualité : Kamal Amzal neɣ Muḥsin Fikri: Imaziɣen ur tettqili lmut,.... ar melmi ?

Actualité : Kamal Amzal neɣ Muḥsin Fikri: Imaziɣen ur tettqili lmut,.... ar melmi ?


“ D tidett, ddula tamaziɣt werǧin ad tili, siwa ma nesbed-itt. Tameslayt nneɣ werǧin ad tettwaru limmer ur tt-nuri, asenǧaq nneɣ werǧin ad yeflali limmer ur t-id-nessuli,........ ”


Ass-a zzin-d 34 iseggasen ɣef tmenɣiwt n Kamal Amzal. Deg ussegas-nni n 1982, ass wis sin n nubember i teḍra txazabit i yeglan s ilemẓi aqbayli n 20 iseggasen. Ur yenɣi, ur yukir, am netta am wid meṛṛa teɣder yir lmut. Di tnuzduɣt n inelmaden n Ben-Aknun di lezzayer i tenɣan at ičumar. S tcuqar d ijenwiyen i d-begsen akken ad sɛeddin awal-nsen, netni ur nesɛi awal n ṣwab, netni i yerran idim d lmut d awalen n yal-as.

I demma n usbeddi n tseqqamutt ara yettmeslayen s yisem n inelmaden di tnezduɣt-agi tasdawant i nɣan Kamal Amzal. Netta, yella gar imagdayen i d-yessawlen i unejmaɛ[1], ma d at iččumar frantt di lǧamaɛ. Kamal, d mmi-s n Tejmaɛt, ilmed belli seg wawal i d-itek nfeɛ. Ma d yir ixṣimen-is mazal s ssif i ferrun timsal.

Ass-nni 2 nubember tameddit, mi yella Kamal ittara ɣef lḥiḍ tiɣri i inelmaden ad d-asen s anejmaɛ, at ičumar ɛeddan fetken-t, ssewzeln-as tudert. Am ass-nni, am ass-a, netni neqqen, nekni nettmettat. Win yenɣan Kamal Amzal qqaren-as Fath-allah Lassouli, ma d wid sen-yezzeɣzafen amrar, mazal ɣezzif ufus-nsen.

Asmekti n tikelt-agi, terna-d deg-s tiyita yeglan s ilemẓi arifi Muḥsin Fikri.

Ilemẓi i yenɣa lmexzen amesbaṭli, am akken d yir ɣerrus deg ugudu. Ass-nni n 28 tuber 2016 i t-yenɣa ubulis deg temdint tarifit Lḥusayma. Muḥsin Fikri ixeddem ɣef uxxam-is, iznuzuy iselman, mačči d leslaḥ neɣ d tilawin i yeznuzu. Iɛseṛ-it ukamyun n iḍuman imi ibɣa ad yessukes iselman-is, ibɣa ad iɣellet tidi-s. Abulisi i s-yenna-n “ɛser-yemma-s” (ṭḥen mmu), iban mačči d arifi, mačči d amaziɣ, mačči d amdan, mačči d ales,...... ibbi wawal !

Si Kamal ar Fikri, siwa tiyita n leɣder i ttbuddun i yimaziɣen.

Agdud n Rif, ur ilaq ara ad yessusem, ur ilaq ara ad yefk mayna. Imaziɣen meṛṛa ilaq ad ilin s idis-is. D tidett irẓa-ten meṛṛa umezruy, iɛesser-iten lmexzen, ineq-iten uǧadarmi, izellu-ten urebrab, .... maca ur tettiwzil taɛkemt imaziɣen, siwa ma zdin lqed-nsen, siwa ma sbedden timura ara yettḥaraben fell-asen.

D tidett, ddula tamaziɣt werǧin ad tili, siwa ma nesbed-itt. Tameslayt nneɣ werǧin ad tettwaru limmer ur tt-nuri, asenǧaq nneɣ werǧin ad yeflali limmer ur t-id-nessuli, Tawrirt-ittwattun d awezɣi ad teffeɣ si tatut limmer ur s-nemjaji. Wid ur numin s yiman-nsen, ulac win ara yamnen-yisen. Win ur nesbed tamurt-is, ad ibib azaglu n tmurt i t-iḥekmen.

D irgazen d tlawin yessebɛaden tamuɣli i d-yeslalayen ddulat ara yettḥuddun ɣef yigduden nsen. Imaziɣen ilaq ad zwin lḥenni i wallaɣ nsen. Ur yelli uwezɣi, siwa ma ssamnen-k yes!

Win ara yenɣen ilmeẓyen yeffuden tilelli, win ara iɛesren bu iselman i ixedmen ɣef warraw-is, win ara yarzen imeɣnasen n izerfan n umdan, mačči d annuz i yuklal. Maca, d “la Rifolution”, d tagrawla, d asekfel n yiɣsan n wid yemmuten ɣef tlelli d izerfan i wakken ad nesnerni agraw, ma terra tmara.

Ahat ad ntezzi deg wawal, am akken itezzi yis-nneɣ umezruy. Maca tallit tbeddel, ma yella tagrawla tessusem, iḍes ur teṭṭis ara.

Amaziɣ ur t-iteṣṣer udrar, ur t-iteṣṣer usefru. Ddunit tedda d win ibedden. Amzabi, aqbayli, arifi, anfusi, atg. Xas mazal ad ɣellin, maca aɣelluy-nneɣ ad yili d aɣelluy n yired ar waluḍ.

Ssaɛid At Ṭeyyeb

 

[1] Une assemblée générale

Yefɣed ass 01-11-2016


Autre

Un nouveau site web pour le combat Kabyle

Γer amagrad-a

Societé

Taɣzut un village sans sources d'eau lance un appel de détresse

Γer amagrad-a

Societé

Appel aux dons et à la solidarité

Γer amagrad-a

Actualité

Les lycéens Kabyles sont aussi souverainistes

Γer amagrad-a

Culture

Construire des théâtres grecs en Kabylie. Par Ameziane Kezzar et Mohand Lounaci

Γer amagrad-a

Autre

Aider à rapatrier le coprs du défunt DOUBAL Mohand

Γer amagrad-a